#يا الحرة#
حارص مارس
جاك العيد
فرحي اليوم
طلبي من السما
زمن جديد.
حارص مارس
زهرك ناعس
هلالك مرهون
ف لعلا تاعس
فرحي اليوم
رقصي ب خناث
كيف ملاك بين النجوم
رقصي يا للا ونساي
العقبة للعام الجاي.
من قديم زمان
يا للا وعلامك ناكس
رمي الهموم
جاتك هدية من بلاد الروم
اليوم اتفكو الطلامس
حارص مارس
رقصي التويست والفالس
حلال عليك التحزيمة
رقصي وضربي النواقس
جاك عاشور على قصبة
جاك و ف يديه ربابة
فاق فيه لكلام الراكد
فرحان ب العيد الكدبة
ها القصبة وسط السربة
ها البارود بلا حبة
خطي السربة وشدي ندبة
ندبي في زمان الغلبة
عيشوري عيشوري
حليت عليك شعوري
عيشوري يا عيشوري
لمن نقرا زابوري
على فياق النبوري
عيشوري عيشوري
خد المعنى ف سطوري
وعدر عفاك هتوري
حارص مارس
جاك العيد
يالحرة يازهرة القلوب
ليك يا لالا ف فرحت لبنات
لك الحنة وزغاريد
ولك ا مولاتي ماية
ولك لولاد تغني وتزيد
نسالك لله يا الحرة
واش نهديك ف عيدك خلخال
واش نهديك عقال جديد؟
ما يدوم حال
الوقت بدال
وصياد الغابة
لابد فيوم يصير
فريسة للصيد.
شدي الحيل
غني لليل
كيف غنات
ف محانها العبيد
حارص مارس
ها لمحاين ها لفقايس
ضيم وحكرة
لا من يسايس
بزيم وضرة
ضاقت العشرة
لا من يكايس
طاحت البكرة
طلقوا الهدرة
وزعو الهبرة
ومن عظامك
صنعو لعرايس…..
فرحي اليوم
صيحي يا قوم
انا ماني رخيصة فالسوم
بغيت لعشرة بالمعروف
بغيت نعيش بلا خوف
عييت نشوف عييت نطوف
من قبة ل قبة
عييت من بخور الشبة ولهتوف
اوف اوف اوف
ما نفعو حروف
ولا نفعت دعوة لكفوف………..
ما بقا كلام
بغيت انا حقي والسلام
ياك خلقنا ربي بحال بحال
خلقنا فينا نسا ورجال
تجمعنا لبلاد يا لعباد
ولحزان وفرحة لعياد
يجمعنا الحب…
تجمعنا لخاوة وعزة لولاد
هاك وارا
بلا حزارة
بلاقجارة
بلا شطارة
بلا ضسارة
أنابنادم
مايشريني ملاك ولا خاتم
انا لمرا حمار الخيمة
مانيش الخادم…..
يتبعقصيدة يالحرة
شتف هتف
اللي غلب اعف
الحق ما يتنسى ما يتلف
شتف هتف
الله عظيم خلق وشرف
وبنادم تايه اخرف
شتف هتف
الوقت وقف
يا رب لطف
والحال ممنوع من الصرف
سرقتو من عيوني لحلام
سرقتو مني ربيع ليام
ولي درتو بلعاني لجام
نسيت راسي
اه يا ما دارت في ناسي
حارص مارس
توحشتني وجيت نطل
لقيت وجهي
ولقيت الغاشي علي ملهي
وكلشي على حقي ساهي.
رميت راسي وسط الزحام
وشفت ناسي
خلات الله
ورجعت تعبد لصنام.
زماني عمى
يسري على وجهو الظلام
لقيت لحية
من قلة لحيا
تبيعني صورة ف الريكلام
يا من يشري
لحمة حلال وصوت حرام
لقيت شحال من قبة وعلام
شحال من خطبة وكلام…….
يا ربيعي تجيني بالورد
وتجي النحل
وتخرج لقنافد
وكلها منين كيجبد…
ف زماني الملح دود
و فعروقي الدم برد
حتى لين
ونتما ديرو بي حلقة
وتلبسوني ف عيدي جلد القرد
حتى لين
على جناب سمايا قرحة
حتى يجي مارس
ويكرنني بنفحة فرحة
الله
يعطيكم الصحة
عطيتوني عظم فاش نكدد
ترشو جراحي بالملحة
عييت نصبر عييت نبرد
يا نن يسجد يا من يعبد
شوف امك بنتك واختك
واش فيهم ما يتمرمد
لله شوف ساوي ونصف
وصلح رايك حيث فسد
صلح رايك حيث فسد
صلح رايك حيث فسد
بقلم الزجال عبد القادر بوبول
من زاوية الشيخ
